NOVELA GRÁFICA: manga e cómic

Este foi o primeiro ano en que funcionou un grupo de novela gráfica. O ano anterior xa se fixeran algunhas lecturas, pero integradas dentro do grupo de 3º e 4º de ESO.

A experiencia foi moi positiva, porque se conformou unha rapazada do máis diverso tipo: grandes lectores de novela, só adictos ó manga, escasos coñecedores da novela gráfica, alumnado de diferentes niveis (desde 1º ata 4º de ESO) e con ritmos distintos de aprendizaxe. To do isto conferíulle ó grupo un colorido diferente ó dos outros clubs do instituto.

A integración das diferentes opinións sobre o funcionamento e a selección fíxose dun xeito natural. Cada membro escoitaba ós mais coñecedores de cada tema e paulatinamente fóronse integrando, aportando e , sobre todo, escoitando as propostas que os máis  “frikis” aconsellaban.

As reunións tiñan lugar quincenalmente, facendo mesa redonda onde se amosaban os títulos que se decidían para ler ou se formulaban propostas para a adquisición por parte da Biblioteca e do Club. Tamén se creou un fondo de préstamos personais, onde se intercambiaban cómics e mangas -estes foron maioría- dos proprios membros.

O resultado e a valoración deste grupo foi moi positiva, polo  que a presenza deste grupo nos vindeiros non só está asegurada, senón que irá en aumento.

A continuación presentamos algúns dos títulos  e traballos realizados polos compoñentes do grupo, que consisten en grabacións en vídeo de opinións das obras lidas. (ver blog)